سبب للفرح

فى دايما سبب انك تكون زعلان.....انك تكون قرفان.......انك تكون مخنوء......انك تبقى مش عايز تقوم من السرير.....انك مش عايز تنزل شغلك أو كليتك..........

بس يا ترى بتلاقى أسباب عشان تكون فرحان....أو عشان تكون مبسوط؟
ها....لاقيت اجابه.....كانت اجابتى لنفسى"انى مش بشغل بالى بأوقات فرحى اللى بفكر فيه اكتر أنا ليه زعلانة و أزعل نفسى بسببه أكتر,لكن لما بفرح...بمبسط و خلاص مش بفكر ليه ولا بسبب ايه"

رغم انك ممكن تفرح من أاقل حاجة زى ما انت بردو بتزعل من اأقل حاجة......

و دايما فى حواليك أسباب فرح....و ده اللى أنا اكتشفته....وحبيت أنى اشاركوا بيه و يمكن تفكروا فيه انتوا كمان

فى دايما سبب فرح......
لما بتلاقى حد جنبك بتعبرلوه عن اللى جواك حتى لو انت متأكد انه ممكن ميفهمكش..بس انت طلعت اللى جواك فإفرح

لما بتلاقى حد انت بتحبه و بتموت فيه موجود فى حياتك.....كفاية انه موجود فى دنيتك فإفرح

لما بتلاقى أصحاب أنت بتنبسط معاهم من اقل حاجة حتى لو كانت مجرد أكلة بطاطا من الشارع ,او سمعت نكته معاهم و ضحكت من قلبك.....على الاقل انت لسه عارف انك مع ناس بتتصرف على طبيعتك معاهم فإفرح

لما بتلاقى موبيلك بيرن و شخص انت مكنتش متوقعه بيقولك...مزاجك مالوه؟مش مظبوط ليه؟يلا هتذاكر ايه و انا هذاكره معاك؟يلا السنه سهلة و سمعك و انت بتشتكى...رغم انها مكالمه معدتش ال10 دقايق الا انك حسيت انك مش لوحدك...فإفرح

لما نفس الموبيل بيرن و شخص تانى بيكلمك و يقولك انت فين؟انت على بالى؟طمنا عليك....بتعرف انك فارق عند ناس حواليك فإفرح

لما بتلاقى sms مبعوتالك فيها نكته ولا الشه و لا سؤال عن يعنى ايه كوك زيرو.....اعتفد انها المقصود منها انك تفرح....فإفرح

لما بتبقى عارف انك عندك عيله كبيرة فوق ال20 نفر و عارف ان يوم حزنك او فرحك هيبقوا جنبك.و فى وقت الاعياد بتبقوا سوا...اعتقد انه سبب انك تفرح منه...فإفرح

لما تصرخ فى وش حد و تقوله"أنا جنبك...أو انت وحشنى"أو بس تكلمه انك تسمع أخباره...ده هيفرحه و انت كمان من حقك تفرح....فإفرح

لما حد بيقولك كلمة حلوة...بتحس انها مبعوته من ربنا.....و ساعات بتبقى وحشه بتفوقك اه....فى كلتا الحالتين لازم تفرح...فإفرح

لما حد انت بتحبه بتحصله حاجة حلوة و بيبقى مبسوط و بيشاركك فرحته و تحس ان الدنيا مش سيعاه...فرحه اكتر و افرح...فإفرح

لما بتفتكر الحاجات اللى فى حياتك اللى زعلتك و اللى انت بتستحقر فيها نفسك و تفتكر اشخاص علاقتك بيهم اتقطعت او اصحاب المسافة بعدتكوا عن بعض او ذكريات مش بتحبها.....ده بيزعلك و بيرمى حزن جوه قلبك لما تقول اه من سنة كنت حاجه تانيه ولا من شهرين ولا لو كنت بس عملت الحاجه الفلانيه....بس فى لحظة تفتكر ان ده فعل ماضى و ان كل ده كان امبارح و انت انتهيت منه و مش فايد بحاجه انك تفتكر او تندم.....يبقى مش فاضل غير اختيارين؟تزعل أو تفرح.....من خبرتى لسه اودامك كتير اختار انك تفرح...فإفرح

لما بيبقى فى عيد و بتزين البيت.....و بتبقى مبسوط زى العيال الصغيرة و تفتكر قد ايه و انت صغير كنت بتستنى الايام دى و بتفرح بيها....ليه مفرحش دلوقتى؟انا بقولك افرح بيها...... فإفرح

اسبابى لسة مخلصتش بس انا سيبلكوا مكان عشان تفكروا فى اسبابكوا انتوا.....و اقولكوا "كل سنة و انت طيبين"و امنتى السنة دى"انى الاقى اسباب فرحى حواليا و اعرف اشوفها"

و افتكروا ........فى دايما سبب للفرح.