يو م جديد انتهى دخلت باب بيتى, جريت على اوضيتى و وقفت اودام المرايه فضت جيوبى ادى الموبايل و الفلوس و الكارنيه و البطاقه والmp3 طلعت قصقوصه ورق صغيره مكتوب عليها جمله و بصيت للحيطه و لزقتها عليها.....
حيطه الاوضه....
انا معدتش عارفه هى كان لونها ايه فى الاصل و معدتش لاقيه مكان الزق عليه تانى بقيت بزنق و الزق ورقه فوق ورقه تانيه او ادارى صوره معدتش عجبانى علشان شكلى فيه مش حلو او علشان احاول انسى ذكريات و ساعات كتير بلزق حاجات تفهه جدا زى ورق شكولاته طعمها عجبنى و مش عايزه انساها,و كمان بلزق تذكرات من ناس قبلتهم فى حياتى اصحابى او زمايل بتجمعنا اوقات حلوه.....و ساعات كتير الزق كلمات اغنيه بحبها او صوره لفيلم عجبنى و اكيد مش بنسى ركنى الفنى رسوماتى و فنى الراقى :)
و فى ركن صغير لازقه عليه صلوات بحب ارددها كل يوم,ده غير النتايج القديمه بتاعه السنين اللى مش بيتشالوا و بيتحط فوقهم نتيجه السنه دى على طول و بالمثل جدول الحضور فى الكليه و جدول الامتحانات.....
بس اكبر مساحه متخده هى القصاقيص
قصاقيص ورق كتيره اوى يمكن خطى فيها صغير لدرجه انه مش باين....بس كل قصقوصه فيها حته منى
جمل استفدت منها فى حياتى و عشت بيها و جمل انا اللى مخترعاها و جمل سمعتها من حد و عجبتنى و دروس اتعلمتها فى يومى العادى و غلطات بعملها و مش عايزه انساها علشان مكررهاش و انجازات انا بحققها زى درجه امتحان حلوه او كلمه حلوه قلتها او حاجه عملتها لحد او عملتها فى خدمتى.....
و انا بلزق القصقوصه دى- كانت عزيزه عليه اوى علشان انا تعبت كتير على ما وصلت انى اكتب القصقوصه دى - ضحكت على نفسى علشان من يومين بس كنت بفكر اهد الحيطه دى و اشيل كل اللى عليها......
لزقت القصقوصه و وقفت اتأمل الحيطه بصيت عليها كده.......
اعدت استرجع كل حاجه عليها و افتكر كل حاجه كانت ايه ظروفها و من كام سنه و و كانت الاحداث بدور فى دماغى زى الفلاش باك....معظمها كان بيبقى بالالوان....بس اكتر منطقه اخدت منى وقت فى التفكير هى قصاقيص الورق وقفت اقراء قصقوصه قصقوصه.....و كل جمله اعد افكر فيها و اشوف اد ايه انا اختلفت عما كنت من سنه او من 3 4 شهور....ببص على نفسى دلوقتى و اقول ازاى انا كنت كده ولا فين الحاجه دى دلوقتى
بس لما بعدت اكتر و بصيت للحيطه من بعيد لاقيت حاجه غريبه اوى اكتشفت ان تكوين كل الحاجات جنب بعد بالهرجله دى عامله شكل حلو اوى طريق مرسوم بس ملوش نهايه و لاقيت ان حياتى عامله كده هى طريق ملوش نهايه بيتكون من اصل حاجات صغيره اوى بس بتبنى فيا و يمكن شكلها جنب بعد مهرجل,
فى الاخر مكونانى انا....
اه انا مش مكسوفه انى اقول انى متكونه من هرجله بس الهرجله دى خلقت اللى انا عليه دلوقتى
لسه قصاقيص الورق هتتلزق و لسه حاجات هتتعاش......
و قصقوصه النهارده كانت"ممكن تخسر معركه مع نفسك بس تكسبى الحرب
ممكن تفتكرى انك خسرتى بس لو قبلتى الخساره ده المكسب
فى وسط ما كنت فاكره نفسك لوحدك لآ اتوقف جنبك و بأيد خفيه
اسمع و اشوف و افكر و اختار و اشارك و اسامح و اعيش و اهم اعرف اصبر
لما تحس بالانتصار على خوفك بيبقى عندك رغبه فى الانتقام من كل لحظات اليأس"
هناك تعليق واحد:
KALAMK 7ELW YA MARYAM ZAYEK TAMAM :)
إرسال تعليق